"Мин ырыам ылланыа, мин аатым ааттаныа" П.А.Ойуунускай төрөөбүтэ 125 сылыгар аналлаах биэчэр

Сэтинньи 29 күнүгэр "Чараҥ сипсиэрэ" литература түһүлгэтигэр саха советскай литературатын тѳрүттээбит, саха талааннаах прозаига, поэта, драматура, биллиилээх общественнай деятелэ, саха норуотун чулуу уола Былатыан Ойуунускай тѳрѳѳбүтэ 125 сылыгар аналлаах “Мин ырыам ылланыа, мин аатым ааттаныа” литературнай биэчэр буолан ааста.

Бу күн биһиэхэ суруйааччы силис туппут сириттэн, Таатта улууһун култууратын уонна духуобунаһын дьаһалтатын салайааччылара ыалдьыттаан бардылар. Оҕолор П.А. Ойуунускай хоһооннорун аахтылар, “Дьулуруйар Ньургун Боотур” олоҥхотуттан, айымньыларыттан быһа тардыылары туруоран көрдөрдүлэр. Саха -английскай кафедра учууталлар "Таатта үрэх үрдүгэр" диэн ырыатын ыллаатылар. Гимназиябыт координатора Петр Петрович Дьяконов Былатыан Ойуунускай оруолун итэҕэтиилээхтик толорон, көрөөччүлэр үрдүк биһирэбиллэрин ылла.

Биэчэр олус интэриэһинэйдик, таһымнаахтык ааста. Бүттүүн оскуоланан “Великие имена России” аахсыйаҕа Саха сирин аэропордугар П.А.Ойуунускай аатын иҥэриитин куоластааһыныгар көхтөөх кыттыыны ыллыбыт, кини сырдык аатын үйэтитиигэ бэйэбит кылааппытын киллэрдибит.

Оҕолор бу тэрээһин туһунан санааларын эттилэр.

Уля ПАВЛОВА, X “А” кылаас:

– Мин санаабар, П.А Ойуунускай төрөөбүтэ 125 сылыгар аналлаах биэчэр олус үчүгэйдик ааста. Бары кылаастар кини айымньыларыттан быһа тардыылары көрдөрдүлэр. Холобур, биһиги , Х “a” кылаастар , «Көҥүл ырыа» диэн хоһоонун ааҕан иһитиннэрдибит.

Нарыйаана ПЕТРОВА, XI кылаас:

– Хас биирдии кылаас туруоруута ураты, наһаа үчүгэй. Ол эрээри, мин ордук «Дьулуруйар Ньургун Боотур» олоҥхону туруорбут кырачаан V «б» кылаас үөрэнээччилэрин сэргээтим. Кинилэр бэркэ бэлэмнэнэн кэлбиттэрэ, тэрээһиҥҥэ эппиэтинэстээхтик сыһыаннаспыттара харахха быраҕыллар.